जनसंघर्ष न्युज नेटवर्क
नागपूर, ता.१३ : ५६ व्या महाराष्ट्र राज्य व्हॉलीबॉल अजिंक्यपद स्पर्धेतील महिला गटाच्या अंतिम सामन्यात पुणे संघाने जिद्दी नाशिकवर मात करत विजेतेपदावर आपले नाव कोरले. आनंदनगर क्रीडा मंडळाच्या मैदानावर रंगलेल्या या सामन्यात पाच सेटपर्यंत तुफान संघर्ष पाहायला मिळाला. शेवटच्या क्षणापर्यंत रंगलेल्या या लढतीने प्रेक्षकांची उत्सुकता शिगेला पोहोचवली.
सामन्याच्या सुरुवातीपासूनच दोन्ही संघांनी आक्रमक खेळ करत विजयासाठी जोरदार झुंज दिली. पुणे संघाने पहिल्याच सेटमध्ये २५-२२ अशी आघाडी घेत आपली ताकद दाखवून दिली; मात्र नाशिकने लगेचच सावरत दुसरा सेट त्याच फरकाने जिंकत बरोबरी साधली. तिसऱ्या सेटमध्ये पुणेने पुन्हा २५-२० अशी सरशी करत सामन्यावर पकड मजबूत केली.
नाशिक संघाने हार मानली नाही. चौथ्या सेटमध्ये २५-२३ अशी झुंज देत त्यांनी सामना पुन्हा निर्णायक टप्प्यावर आणला. त्यामुळे अंतिम सेटमध्ये दोन्ही संघांकडून अक्षरशः जीव तोडून खेळ पाहायला मिळाला. प्रत्येक गुणासाठी झुंज देताना खेळाडूंनी उत्कृष्ट समन्वय, बचाव आणि आक्रमणाचे दर्शन घडवले.
निर्णायक पाचव्या सेटमध्ये दोन्ही संघांमध्ये अटीतटीची चुरस निर्माण झाली होती. अखेर पुणे संघाने १८-१६ अशा निसटत्या फरकाने विजय मिळवत विजेतेपद आपल्या नावावर केले. या थरारक विजयाने पुणे संघाने संपूर्ण स्पर्धेत आपली सातत्यपूर्ण आणि दमदार कामगिरी अधोरेखित केली.
या यशामुळे पुणे महिला संघाने राज्यस्तरीय स्पर्धेत आपला दबदबा सिद्ध करत ‘महाराष्ट्र राज्य विजेते’ होण्याचा मान पटकावला.
Author: Jan Sangharsh News
जन संघर्ष न्यूज लाईव्ह
