जनसंघर्ष न्यूज नेटवर्क
भिगवण :- भिगवण पोलिसांनी एक महत्त्वपूर्ण कारवाई करत भिमा नदीच्या पात्रात मासेमारी करण्यासाठी वापरल्या जाणाऱ्या मच्छीमारांच्या बोटींचे इंजिन चोरी करणारे दोन चोरटे अटक केले. या कारवाईत पोलिसांना ८ लाख ३० हजार २०० रुपयांचा मुद्देमाल जप्त करण्यात यश मिळाले. सी.सी.टी.व्ही. फुटेज, जी.पी.आर.एस व गोपनिय बातमीदार यांच्या मदतीने आरोपींना अटक करण्यात आली.
भिगवण पोलिसांनी केलेल्या तपासातून दत्तु हिरामन घटे (वय ३८) व रमेश हिरामन गव्हाणे (वय ३७) या दोघा आरोपींना ताब्यात घेतले. हे दोघेही वरखडे, ता. नेवासा, जि. अहिल्यानगर येथील राहणारे आहेत. कुंभारगाव, धुमाळवाडी (ता. इंदापुर) गावच्या हद्दीतुन सोमवारी (ता. २७) सकाळी अनिल नामदेव धुमाळ यांच्या मालकीची होंडा कंपनीची ५ एच.पी १६० सी.सी बोटचे इंजीन चोरीला गेले होते.
पोलिसांनी केलेल्या चौकशीत आरोपींनी गुन्हा केल्याची कबुली दिली. त्यांच्याकडून ४ बोट इंजिन, एक लोखंडी बोट व इतर साधणे असा ८ लाख ३० हजार २०० रुपयांचा मुद्देमाल जप्त करण्यात आला. भिगवण पोलीस ठाण्याचे सहायक पोलीस निरीक्षक विनोद महांगडे यांनी याबाबत माहिती दिली.
वरिष्ठांच्या मार्गदर्शनाखाली भिगवण पोलीस ठाण्याचे पोलीस उपनिरीक्षक प्रविण जर्दे, पोलीस अंमलदार विठ्ठल वारगड, पांडुरंग गोरवे, सुभाष गायकवाड, प्रसाद पवार, सचिन पवार, रणजित मुळीक यांनी या कारवाईत महत्त्वपूर्ण भूमिका बजावली. गुन्हयाचा पुढील तपास पोलीस अंमलदार विठ्ठल वारगड करीत आहे.
Author: Jan Sangharsh News
जन संघर्ष न्यूज लाईव्ह
